فترة الاكتئاب لطلاب الدراسات العليا

• نشرت من الدكتور/ مصطفى كيلاني ١٨ نوفمبر فشلت في التعليم ## الدراسات العليا (الماجستير- الدكتوراه)  49 عرض
  انقر للتقييم

  للباحثين... فترات الاكتئاب

   بيحصل للباحث بالذات في الماجستير فترات اكتئاب وفصلان وفقدان الرغبة انه يكمل وممكن يوصل الامر انه يلغي الموضوع برمته....

  اولا لازم تعرف ان دي مش حالة فردية وانما شئ شائع ومنتشر ثانيا الاكتئاب دا ليه اسبابة فلازم تعرفها عشان تقدر تعديها والاسباب دي كالتالي

  1.الاستعجال باحث الماجستير بالذات بيكون مستعجل جدا عشان يخلص رسالتة ويناقش والاستعجال دا بيورطة فحاجتين الاولى الكروتة والشغل المسلوق وبالتالي ميعجبش المشرف ويرجع يعملة تاني فيتأخر تاني فيكتئب تاني... الحاجة التانية ان اي عطلة ولو طفيفة تقلب مزاجة وتدايقة فيتوتر ويكتئب بردو... بلاش استعجال اعمل شغلك صح وادية وقته عشان مترجعش تعيده تاني 2.الطموح الزائد انت مش عالم ولا جهبز انت مجرد باحث مبتدئ.... اولى حضانة بحث علمي لازم تعترف بدي كويس جدا عشان طموحك ميورطكش فحاجات متقدرش تعملها بحكم خبرتك المحدودة خليك واحدة واحدة على نفسك

   3.الانا الاعلى زي ما قولت انت مجرد باحث مبتدئ... يعني هتغلط هتغلط لانك لسة بتتعلم فبلاش تعيش فدور العالم واي نقد او تعديل تاخدة على كرامتك انت متفرقش عن تلميذ الحضانة كتير لازم تتواضع وخد الموضوع ببساطة وعادي والله واستاذك اللي بينتقدك وممكن يهزقك دا هو كمان انتقد واتهزق وانت كمان هتنتقد تلاميذك وتهزقهم...

   دي طقوس بحثية على فكرة

  4. الروتين بلدنا بلد ورق واختام وروتين ودي حاجة خارجة عن ارادتك وارادة اي حد فوض امرك لله فيها وكل شئ بمعاد 5.النفسنة البحث العلمي مفهوش غيرة ونفسنة وكيد نسوان... كل باحث ليه موضوع وشغل مختلف مش معنى ان زميلك او زميلتك ناقش يبقى فيك عيب لا دي تساهيل من عند الله... وبردو مش معنى انك ناقشت وخلصت تبقى انت اشطر او احسن... لا بردو دا حظك وبختك كدا الشطارة والكفاءة ملهاش دخل اطلاااااقا في انك تخلص وتناقش الاول لان زي ما قولت في هوامل تانية كتير زي المشرف والروتين وظروفك الخاصة 6.الظروف المادية البحث العلمي مكلف ومرهق ومجهد وبيحتاج مصاريف كتير ووارد جدا تتعثر في الطريق بسبب الفلوس ودا امر طبيعي بالذات لو انت باحث بتعتمد على اهلك او موظف ومرتبك صغير ودي ممكن تتغلب عليها بشوية تدبير وتنظيم مصاريف والبحث عن احسن طرق التوفير

  7.علاقتك بالمشرف لازم تفهم ان المشرف دا مش شغال عندك ولا مربوط ليك لوحدك... دا راجل لية ارتباطات ومسئوليات وطلاب ومهام ادارية وبحثية وحوارات كبيرة جدا انت حاجة منها.... دا غير حياتة الخاصة واسرتة واولادة.... والسن والمرض لان اغلبهم ناس كبيرة في السن فمينفعش تحكم علية من وجهة نظرك وتحط قدراتك الصحية مقياس... وارد جدا ميكونش متاح ليك في اي وقت حاول تتأقلم مع الوضع دا ومتخدش الموضوع انه اهانة او استخفاف بيك 8.امكانياتك البحثية زي قدرتك على البحث عالنت وقدرتك على الكتابة على الكمبيوتر... ضعفك في بعض النقاط البحثية زي التوثيق مثلا او استخدام المنهج...

   ونرجع ونقول انت لسة بتتعلم وطبيعي تكون واقع في جانب او عدة جوانب الحاجة اللي انت ضعيف فيها قوي نفسك فيها وكل حاجة هتلاقيها على النت وهتلاقي اللي يساعدك

  9.بياعين الفجل ودول فئة من الناس مش هتقدر اللي انت بتقوم بيه ولا هيقدروا بدون قصد او حتى عن قصد ومن وجهة نظرهم كل اللي بتعملة كلام فارغ وهري عالفاضي ودول تسيبك منهم خالص وحتى متفتحش معاهم كلام في اللي انت بتعملة لانهم هيتفننوا انهم يقللوا منك ويحرقوا دمك وانت اولى بالوقت والمجهود اللي هيضيع معاهم واخيرا اهم حاجة انك تتخطى فترات الاكتئاب دي بسرعة ومطولش فيه