#للباحثين....بداية كتابة الرسالة وتنظيم الفصول
الشكوى المستمرة من الباحثين ...انا مش عارف ابدأ شغل في الرسالة ...ابدأ ازاي...؟
شوف يا صديقي الموضوع بسيط جدا ويمكن تلخيصة في كام خطوة معدودين
اول حاجة هتعملها زي ما بنقول دايما هتجيب رسالة من القسم بتاعك ويكون نفس المشرف بتاعك
بعد ما تجيب الرسالة تحدد الاتي وتكتبة عندك
١. هي كام فصل
٢. كل فصل بيتكلم عن اي ...يعني مثلا الفصل الاول الاطار المنهجي المشكلة والاسئلة والاهداف...الخ، الفصل الثاني الدراسات السابقة ، الثالث اطار نظري.....الخ ، لان الترتيب دا بيختلف من تخصص لتخصص ومن قسم لقسم
٣. هتحدد نمط التوثيق اللي هتمشي عليه طول الرسالة
٤. هتحدد الحجم التقريبي للرسالة كام صفحة
الخطوة التانية تعمل خريطة محتويات لرسالتك ...بمعنى
هتيجيب كراسة كدا وتكتب الفصل الاول ويحتوي على كذا وتكتب عناصر الفصل الاول
مثال انت بتعمل دراسة عن فاعلية برنامج تدريبي قائم على تقنية الهولوجرام في التغلب على السلوكيات النمطية للاطفال ذوي طيف التوحد ...
الفصل الاول...اطار منهجي ...مشكلة اهمية اهداف ...الخ
الفصل الثاني دراسات سابقة ويتكون من
محور اول دراسات عن تقنية الهولوجرام لعلاج طيف التوحد
تعليق على دراسات المحور الاول
محور تاني دراسات عن البرامج التدريبية في علاج السلوكيات النمطية للاطفال ذوي طيف التوحد
تعليق على دراسات المحور الثاني
تعليق عام
مدى استفادة الدراسة الحالية من الدراسات السابقة
الفصل الثاني اطار نظري
محور اول السلوكيات النمطية لاضطراب طيف التوحد
اولا المفهوم
ثانيا النظريات
ثالثا الخصائص
رابعا تاريخ تطور العلاجات
المحور الثاني تقنيات الهولوجرام وعلاج طيف التوحد
مفهوم الهولوجرام
التطور
الخصائص
المميزات
العيوب
الفصل الثالث التطبيق العملي والمعالجة الاحصائية
الفصل الرابع النتائج والتوصيات
الملاحق
البرنامج
مقياس السلوك النمطي
كدا انت عملت الخريطة وتبدأ تجمع الداتا
اول حاجة هتجمع داتا عن البرنامج لان البرنامج دا هو اهم حاجة فدراستك تجمع دراسات عملت برامج قريبة منه وتمشي على الخطوات بتاعتهم
وانت بتجمع الداتا تخفظهم كالتالي
ملف لكل فصل
داخل ملف الفصل ملف لكل محور
داخل ملف المحور ملف لكل عنصر
لي التعب دا في الحفظ عشان لو نسيت توثق حاجة تعرف توصل ليها بسرعة ومتخدش وقت
الخطوة الثالثة ...تبدأ تكتب
كل فصل ملف لوحدة متعملش الرسالة كلها ملف واحد عشان تبقى خفيفة عالجهاز
هتعمل ملفين وورد لكل فصل ملف المتن وملف التوثيق
وهتمشى على الخريطة اللي انت عملتها في الخطوة التانية
هتمسك عنصر عنصر وتكتب تخلصة تتنقل على اللي بعدة
تحدد لنفسك كم معين من الشغل لازم تخلصة كل يوم حسب ظروفك وحسب حجم العنصر
توثق اول باول اي حاجة تكتبها واوعى اوغي اوعى تأجل التوثيق
توثق في المتن وانت فاتح الملف التاني فنفس الوقت تكتب التوثيق كامل فيه
تعمل نسخة احتياطي لشغلك باستمرار عشان ميضعش
الخطوة الرابعة المتابعة مع المشرف
خليك ذوق المشرف مش شغال عندك ولا بتاعك لوحدك فتصبر وتطول بالك وتتقبل النقد بهدوء وتنفذها حرفيا
واي استفسار ممكن تتواصل معايا وبالتوفيق للجميع
